Pepe Reina អ្នកចាំទី Napoli ខ្ចីជើងពី Liverpool បានបញ្ជាក់យ៉ាងច្បាស់ថាខ្លួនគ្មានថ្ងៃវិលត្រលប់មកពាក់អាវហង្សក្រហមម្ដងទៀតនោះទេ។ ជាមួយគ្នានេះដែរ អ្នកចាំទីវ័យ៣១ឆ្នាំរូបនេះ ក៏បានលើកឡើងពីការចាកចេញពីក្លិបទាំងជូរចត់នាពេលកន្លងមកនោះដែរ។
Reina បានធ្វើការជាមួយអតីតអ្នកចាត់ការរបស់ខ្លួន គឺ Rafael Benitez នៅ Napoli ហើយបានចាប់ផ្ដើមបញ្ចេញភាពខ្លាំងរបស់ខ្លួនជាថ្មីនាដើមរដូវកាល Italy Serie A បូករួមទាំងការក្លាយជាអ្នកចាំទីដំបូងដែលអាចជួយសង្រ្គោះបាល់ប៉េណាល់ទីរបស់ Mario Balotelli ផងដែរ ពេលក្រុមខ្លួនឈ្នះនៅទឹកដី AC Milan ជាលើកដំបូងក្នុង២៧ឆ្នាំចុងក្រោយ។ លទ្ធផលនេះអាចជាការប៉ះប៉ូវឡើងវិញនូវការខកចិត្តត្បិតត្រូវបង្ខំឲ្យចេញពី Liverpool ទាំងមិនដឹងខ្លួនមុននាពេលកន្លងមក ទោះបីជួយក្លិបនេះបានយ៉ាងច្រើនក៏ដោយ។
Reina ដែលសល់រយៈពេល៣ឆ្នាំក្នុងកិច្ចសន្យាជាមួយហង្សក្រហម បាននិយាយថា៖ “វាជារឿងគួរឲ្យភ្ញាក់ផ្អើល។ គឺក្លិប (Liverpool) ដែលបង្កើតឲ្យមានការប្ដូរនេះ។ ខ្ញុំកំពុងសម្រាកវិស្សមកាល ហើយមិនមានអ្នកណាម្នាក់ប្រាប់ខ្ញុំអ្វីនោះទេ។ ភ្លាមៗនោះ Napoli បានទូរសព្ទមកខ្ញុំ ហើយប្រាប់ថាពួកគេបានយល់ព្រមលើលក្ខខ័ណ្ឌខ្ចីជើងជាមួយ Liverpool ខណៈ Liverpool ក៏ប្រាប់ខ្ញុំដូចគ្នានេះដែរនៅ២ថ្ងៃបន្ទាប់។ ប្រហែលពួកគេ (Liverpool) មានហេតុផលផ្ទាល់ខ្លួន”។
Reina ស្រែកក្រោយសង្រ្គោះបាល់ប៉េណាល់ទីស៊ុតដោយ Balotelli
អ្វីៗបានកើតឡើងយ៉ាងរហ័ស ហើយអ្នកចាំទីសញ្ជាតិអេស្ប៉ាញរូបនេះ បានចុះកិច្ចសន្យាខ្ចីជើង១រដូវកាល។ Benitez នឹងធ្វើយ៉ាងណាអាចទិញ Reina មក Napoli ជាអចិន្ត្រៃយ៍តែម្ដង ប៉ុន្តែត្រូវប្រជែងជាមួយ Barcelona ដែលចង់អ្នកចាំទីនេះដូចគ្នា ខណៈ Victor Valdes នឹងចាកចេញក្រោយចប់កិច្ចសន្យានាឆ្នាំក្រោយ។
Reina មិនទាន់ប្រាកដថាអ្វីនឹងកើតឡើងនោះទេ ប៉ុន្តែអ្វីដែលអាចថាប្រាកដបាន គឺរូបគេនឹងមិនវិលទៅ Anfield វិញឡើយ។ អ្នកចាំទីជម្រើសជាតិអេស្ប៉ាញ បានឆ្លើយយ៉ាងខ្លីថា “No” អមដោយកាយវិការគ្រវីក្បាល មុននឹងបន្តថា៖ “នៅពេលនេះគឺជាកាលៈទេសៈដ៏លំបាកក្នុងការគិតថាអាចក្លាយជាកីឡាករ Liverpool នាឆ្នាំក្រោយ។ ពួកគេមានអ្នកចាំទីវ័យក្មេង Simon Mignolet ហើយអ្នកចាត់ការចង់បានគាត់ជាងខ្ញុំ”។
អតីតយុវជនរបស់ Barcelona រូបនេះបានបន្ថែមថា៖ “ខ្ញុំចង់រីករាយក្នុងឆ្នាំនេះ។ វាជារឿងដ៏សំខាន់មួយសម្រាប់ខ្ញុំជាមួយ World Cup ដែលជិតមកដល់ ហើយអាចវិលមកលេង Champions League និងលេងដើម្បីប្រជែងយកពានរង្វាន់ (Serie A)។ ទាំងនេះជាអ្វីដែលខ្ញុំខកខានក្នុងរយៈពេលពីរបីឆ្នាំចុងក្រោយ។ ខ្ញុំរីករាយដែលអាចលេងក្នុងកម្រិតកំពូលនេះជាថ្មី”។
ដូចដែល Reina បានបញ្ជាក់ខាងលើអញ្ចឹងដែរ Liverpool ឲ្យ Nopoli ខ្ចី Reina មិនមែនដោយសារលែងចង់ប្រើប្រាស់អ្នកចាំទីនេះទេ ប៉ុន្តែដោយសារបញ្ហាហិរញ្ញវត្ថុប៉ុណ្ណោះ។ ប្រិយមិត្តអាចចុចទីនេះដើម្បីអានលម្អិត។
Pepe Reina នឹងវិលទៅអង់គ្លេសជាថ្មីនាសប្ដាហ៍ក្រោយ ពេល Napoli ជួប Arsenal នៅ Champions League។
0 comments:
Post a Comment