នៅទីបំផុត Rafael Nadal អាចដណ្ដើមយកតំណែងលេខ១ពិភពលោកពី Novak Djokovic បានវិញហើយនាថ្ងៃនេះ (ចន្ទ) ក្រោយឡើងដល់វគ្គផ្ដាច់ព្រ័ត្រ China Open។ ទោះការប្រកួតនោះ Djokovic បានយកឈ្នះ Nadal ដើម្បីលើកពានក៏ដោយ ក៏កីឡាករជនជាតិស៊ែបរូបនេះ មិនអាចទប់ Nadal មិនឲ្យដណ្ដើមចំណាត់ថ្នាក់កំពូលពីខ្លួនបានឡើយ។
Nadal នៅក្នុងការប្រកួតផ្ដាច់ព្រ័ត្រ China Open
នៅចាំបានថា Nadal បានធ្លាក់ចំណាត់ថ្នាក់ជាបន្តបន្ទាប់ ក្រោយរងរបួសជង្គង់អស់រយៈពេល៧ខែ។ ប៉ុន្តែក្រោយវិលត្រលប់ចូលទីលានប្រកួតវិញ កីឡាករម្ចាស់ជើងឯក ១៣ Grand Slam រូបនេះ បានយកឈ្នះពានដល់ទៅ១០ ក្នុងនោះក៏មានពាន Grand Slam ២ផងដែរ គឺ French Open និង US Open។ ចំពោះកំណត់ត្រាវិញ គឺឈ្នះ ៦៥ប្រកួត និងចាញ់តែ៤ប្រកួតប៉ុណ្ណោះ។
កីឡាករវ័យ២៧ឆ្នាំ បាននិយាយឲ្យដឹងថា៖ “នេះគឺជាឆ្នាំដ៏អស្ចារ្យ ជាឆ្នាំដ៏ល្អបំផុតមួយក្នុងអាជីពរបស់ខ្ញុំ។ វាពិតជាពិសេសណាស់ក្នុងការវិលមកកាន់តំណែងកំពូលវិញ ក្រោយមិនបានលេងជាងកន្លះឆ្នាំ”។
Nadal បានស្គាល់ជាតិឈរនៅលេខ១ពិភពលោកលើកដំបូង កាលពីថ្ងៃទី១៨ ខែសីហា ឆ្នាំ២០០៨ ដោយអាចឈរជើងបាន៤៦សប្ដាហ៍។ បន្ទាប់មកនៅថ្ងៃទី៧ ខែមិថុនា ឆ្នាំ២០១០ កីឡាករជំនាញដៃឆ្វេងរូបនេះ អាចដណ្ដើមលេខ១ពី Roger Federer មកវិញ ហើយអាចរក្សាតំណែងនោះបាន៥៦សប្ដាហ៍ មុនត្រូវបាន Djokovic ដណ្ដើមយកនាថ្ងៃទី៤ ខែកក្កដា ឆ្នាំ២០១១។
ចាំមើលមើល៍ ថាតើការឡើងមកឈរលេខ១ជាលើកទី៣នេះ Nadal អាចរក្សាបានប៉ុន្មានសប្ដាហ៍?
ចង់ដឹងកីឡាករវាយកូនបាល់ណាខ្លះស្ថិតក្នុងចំណាត់ថ្នាក់កំពូលទាំង១០សប្ដាហ៍នេះ សូមមើលតារាងខាងក្រោម៖
| ចំណាត់ថ្នាក់ | ឈ្មោះ | សញ្ជាតិ |
| ១ | Rafael Nadal | អេស្ប៉ាញ |
| ២ | Novak Djokovic | ស៊ែប |
| ៣ | Andy Murray | ស្កុតឡែន |
| ៤ | David Ferrer | អេស្ប៉ាញ |
| ៥ | Juan Martin Del Potro | អាហ្សង់ទីន |
| ៦ | Tomas Berdych | សាធារណរដ្ឋឆេក |
| ៧ | Roger Federer | ស្វីស |
| ៨ | Stanislas Wawrinka | ស្វីស |
| ៩ | Jo-Wilfried Tsonga | បារាំង |
| ១០ | Richard Gasquet | បារាំង |
0 comments:
Post a Comment