ចំថ្ងៃពិធីបុណ្យភ្ជុំបិណ្ឌប្រពៃណីជាតិខ្មែរតែម្ដង មានព័ត៌មានដោះដូរកីឡាករបាល់ទាត់ក្នុងស្រុកមួយគួរឱ្យភ្ញាក់គឺថា ខ្សែប្រយុទ្ធ ឃួន ឡាបូរ៉ាវី បានផ្លាស់ចេញពីក្លិបជើងឯកលីកកំពូលកម្ពុជាឆ្នាំ២០១៣ ស្វាយរៀង ទៅរួមអាជីពជាមួយចម្ការកៅស៊ូបឹងកេត ដែលមានមូលដ្ឋាននៅខេត្តកំពង់ចាម។យើងខ្ញុំបានជជែកសួរជាមួយលោក សំ វ៉ាន់ដេត គ្រូបង្វឹកក្រុមខេត្តស្វាយរៀង ទាក់ទងនឹងបញ្ហាក្រុមក្រោយបាត់បងម្ចាស់ស្បែកជើងមាសពានសម្ដេច ហ៊ុន សែន ២ សម័យកាល (២០១១ – ២០១២) ខាងលើ។
Sabay៖ តើមានបញ្ហាអ្វី ទើបបាន ឃួន ឡាបូរ៉ាវី ចាកចេញពីស្វាយរៀង?
សំ វ៉ាន់ដេត៖ តាមពិតគ្មានរឿងអ្វីក្នុងក្លិបនោះទេ តែដោយមានការចរចារវាងប្រធានក្លិបនិងប្រធានក្លិប ហើយណាមួយកីឡាករគាត់ចង់ចាកចេញផងទើប មានការដោះដូរគ្នាជាមួយនឹងប្រាក់តម្លៃខ្លួនមួយចំនួនតែម្ដងទៅ។ ខ្ញុំក៏សូមសរសើរដល់ ក្លិបបឹងកេត ដែលចង់បានកីឡាករ ហើយមានការចរចាតាមរយៈថ្នាក់ដឹកនាំ ដោយមិនចេះធ្វើអ្វីលួចលាក់។
ឃួន ឡាបូរ៉ាវី (ក្រហម) ប៉ះជាមួយ គីរីវង់សុខសែនជ័យ កាលជាកីឡាកររបស់ស្វាយរៀង ក្នុងរដូវកាលមុន
Sabay៖ តើលោកមានដឹងតម្លៃខ្លួននៃការដោះដូរនេះស្ថិតក្នុងទំហំប៉ុណ្ណាដែរ?
សំ វ៉ាន់ដេត៖ ខ្ញុំមិនសូវដឹងរឿងនេះច្បាស់ទេ ព្រោះខ្ញុំមាននាទីតែបង្ហាត់តែប៉ុណ្ណោះ ប៉ុន្តែតាមឮល្ហៀងៗ តម្លៃខ្លួននៃការដោះដូរប្រហែលចន្លោះពី [៥ ពាន់ដុល្លារ ទៅ ៨ ពាន់ដុល្លារ]។
Sabay៖ ក្រោយការចាកចេញរបស់ បូរ៉ាវី តើមានផលប៉ះពាល់ដល់ក្រុមលោកដែរយ៉ាងណា?
សំ វ៉ាន់ដេត៖ ប៉ះពាល់ចេះតែប៉ះពាល់ហើយ ប៉ុន្តែធ្វើម៉េច បើយើងចង់ឱ្យកីឡាករក្លាយទៅជាអាជីព មានតម្លៃខ្លួន មានប្រាក់បៀវត្សច្រើនជាងមុន យើងមានតែធ្វើបែបនេះ។ ខ្ញុំនឹងរកកីឡាករល្អៗ មកជំនួសកន្លែងគេដើម្បីរក្សាតុល្យភាពរបស់ក្រុម។
លោក សំ វ៉ាន់ដេត កាលពីរដូវកាលមុន
Sabay៖ តើលោកគិតថាកីឡាករណាដែលមានលទ្ធភាពយកតំណែងស្នូលរបស់ ឃួន ឡាបូរ៉ាវី?
សំ វ៉ាន់ដេត៖ ខ្ញុំសម្លឹងឃើញកីឡាករម្នាក់ ដែលជ្រើសចេញពីឈុតយុវជនថ្នាលរបស់យើង។ ក្មេងហ្នឹងបើទៅ អនាគតអាចមានសមត្ថភាពប្រហាក់ប្រហែលនឹង បូរ៉ាវី ដែរ ។ ឥឡូវគេនៅក្មេង ប៉ុន្តែយើងបណ្ដុះប្រហែលមួយឆ្នាំទៀត អាចនឹងឡើងជើង ដូចរាមច្បង ផ្សេងៗ ទៀត។ គេឈ្មោះ ណុប តុលា ធ្លាប់ជាប់ជម្រើសជាតិ U19 កាលពីពេលថ្មីៗ នេះ។
Sabay៖ ក្រោយបាត់បង់ខ្សែប្រយុទ្ធជួរមុខ ដែលមានប្រជាប្រិយភាពក្នុងស្រុក ខាងលើ តើលោកគិតថាស្វាយរៀងនៅតែខ្លាំងដូចកាលពីមុនឬយ៉ាងណា?
សំ វ៉ាន់ដេត៖ តាំងពីដើមរៀងមក សម្រាប់ស្វាយរៀង បាត់បង់កីឡាករម្នាក់ ពីរនាក់ មិនសំខាន់នោះទេ កុំតែបាត់បង់គ្រូបង្វឹក ព្រោះកីឡាករយើងអាចបណ្ដុះបានទៀត ទាស់តែត្រូវចំណាយពេលវេលាយូរបន្តិចតែប៉ុណ្ណោះ។ ខ្ញុំនឹងស្វែងរកកីឡាករបរទេសល្អៗ បន្ថែមនៅកន្លែងដែលក្រុមខ្វះខាត។
Sabay៖ ជាចុងក្រោយតើលោកគ្រូមានអ្វីចង់បន្ថែមទេ?
សំ វ៉ាន់ដេត៖ ខ្ញុំនឹងខិតខំដឹកនាំក្រុម ទោះបីជាមិនបានខ្លាំង តែនឹងប្រឹងប្រែងឱ្យអស់ពីលទ្ធភាពដែលអាចធ្វើទៅបាន ក្នុងរដូវកាលថ្មីខាងមុខ មិនថាពានរង្វាន់សម្ដេច ឬ លីកនោះទេ។
ជីវប្រវត្តិរបស់កីឡាករ ឃួន ឡាបូរ៉ាវី សូមចុចទីនេះ…
អត្ថបទ៖ ម៉ឺន រស្មី
0 comments:
Post a Comment